ગુજરાતી ફિલ્મ ‘વાંઢા વિલાસ’ જોઇને અમુક વિવેચકો ફિલ્મની ભાષા સામે કાગારોળ કરવા લાગ્યા છે. ગુજરાતી ભાષા, સંસ્કૃતિની દુહાઇ દેતા વિવેચકોને જાણ થાય કે સેન્સર બોર્ડના નિયમોમાં સાફ લખ્યું છે કે U/A સર્ટીફીકેટ ધરાવતી ફિલ્મમાં એડલ્ટ કન્ટેન્ટ હોય. જો તમે U/A સર્ટીફાઇડ ફિલ્મ જોવા જાઓ અને સ્વચ્છ સાફસુથરી ફિલ્મની અપેક્ષા રાખો તો કેમ ચાલે ? એમાં ફિલ્મમેકરનો શું દોષ ? શું મેકર્સે ક્યાંય દર્શકો સાથે છેતરપીંડી કરી છે ? શું ‘વાંઢા વિલાસ’ ના મેકર્સે એમ ક્યાંય કહ્યું છે કે આ સાફસુથરી પારીવારીક ફિલ્મ છે ? શું તમે ફિલ્મ જોવા ગયા એ પહેલા તમને ફિલ્મનું નામ ‘વાંઢા વિલાસ’ છે એ ખબર ન હતી ને એમ ને એમ ફિલ્મમાં ઘુસી ગયા તા કે શું ? ફિલ્મ જોવા ગયા પહેલા તમે ફિલ્મનું ટ્રેલર જોયું ન હતું ? ટ્રેલર પરથી સાફ ખબર પડી જ જાય કે આ એડલ્ટ ફિલ્મ છે અને ક્યા પ્રકારના ડાયલોગ્ઝ છે ? શું તમે આ બધાથી અજાણ હતા ? જો તમે ફિલ્મ વિવેચક હો તો ના તો તમે ફિલ્મના મેકીંગ કે બીજા કોઇ પાસા વિષે કેમ ના લખ્યું અને ભાષા અને સંસ્કૃતિ પર જ લખ્યું ?
આપણે માનીએ છીએ કે ફિલ્મમેકર્સની નૈતિક જવાબદારી હોય કે એમણે સાફસુથરી ફિલ્મો જ બનાવવી જોઇએ, પણ એ એમના પર છે કે એમણે કેવી ફિલ્મ બનાવવી છે અને આપણા પર છે કે જોવી કે ન જોવી અને એ જ તો ફરક છે રાજકુમાર હિરાણી, સંજય લીલા ભણસાલી, વિશાલ ભારદ્વાજ, અનુરાગ કશ્યપ, વિક્રમ ભટ્ટ અને બીજા ફિલ્મમેકર્સ વચ્ચે. બોલીવુડમાં અભદ્ર ભાષાનો ઉપયોગ થાય જ છે. અનુરાગ કશ્યપની ગેંગ્ઝ ઓફ વાસેપુર જોઇને ક્યા વિવેચકે ભાષા બચાઓ પર લેખ લખ્યો હતો ? ફિલ્મમેકર્સે ફિલ્મ બનાવી છે તો એમને ખબર જ હોય ને કે એમણે ક્યા ઝોનરની ફિલ્મ બનાવી છે અને એમની ટાર્ગેટ ઓડિયન્સ કોણ છે ? એકબાજુ આપણે એમ કહીએ છીએ કે ગુજરાતી ફિલ્મમેકર્સે અલગ વિષયો અને અલગ ઝોનરની ફિલ્મો બનાવવી જોઇએ અને પછી વાંધા કાઢીએ છીએ, પણ પ્રયત્ન કરશું તો સારી ફિલ્મ બનશે ને ! ગુજરાતી ફિલ્મમેકર્સ હવે નવા વિષયો અને નવા ઝોનરમાં હાથ અજમાવે છે તો બની શકે કે ભવિષ્યમાં U/A નહીં પણ A સર્ટિફિકેટ ધરાવતી ગુજરાતી ફિલ્મો પણ આવે, તો ફિલ્મનું નામ, ટ્રેલર જોઇને જ ફિલ્મ જોવા જવું.